病向淺中醫 （二）

當身體經歷一次「大地震」，人容易疑神疑鬼，連帶其他地方都覺得sensitive 起來，即係我哋俗稱周身唔聚財。

2021年到2022年，我經歷了腰傷舊患最嚴重復發，呢個舊患如影隨行，從小學開始一直都跟住我，以前玩田徑隊跳遠、三級跳拉傷過，細個邊識錫身。如果大家仲記得去年11月我分享過點樣練腰肌嘅圖片，當時應該係我最慘嘅時候。

另外一個困擾我嘅問題係心悸之後，我開始覺得左腹有少少陰陰哋痛，最衰係佢又唔係好痛，又唔係時時痛，就係咁暗暗地若隱若現咁煩住你。

然後2022年3月，迎來左第二次心悸。唔好問我點解又係3月？我都想知！第二次情況比第一次好，因為只係心跳不正常加速，好氣悶，但係其他症狀無出現。

當時係第五波剛開始，學校放緊空前絕後嘅特別假期，我開始思考或許應該去睇下醫生。