四日三夜既台灣親子生命教育之旅完結，今次有九位媽媽一位爸爸，大家都對呢個爸爸贊不絕口，因為好難得有爸爸隻身參與，用行動陪伴兒子加強關係。好多參與的媽媽都無諗過呢幾日會流咁多眼淚，於是我地成立左Cool Cool （哭哭）Club，大家慶幸遇上一班肯為小朋友認真去改變自己，肯熱誠分享亦肯延續呢個信念既同路人。
好多人都問，你成日講「生命教育」，其實即係乜嘢？生命教育既目的，係去建構孩子「優質」的生命力，係用你生命去陪伴佢地生命的一個「過程」，而做父母的正正是孩子如何看待生命的第一關鍵影響人。
今次去學習既機構彩虹愛家，已經推廣生命教育20年，佢哋有一個遠大既夢想，希望可以把生命教育推動至全台所有小學，從而惠及所有小學生。全台大約120萬小學生，距離目標還有很長的路，至今為止也不過達至15萬人。全台2000多家學校，有生命教育服務的也不過三四百家。
這20年，有不少家長加入義工的行列，用行動去支持佢地既工作，機構已經累積左6000個彩虹媽媽。現在每年都會有一個和生命教育有關的音樂劇由家長排演。2019年為慶祝20週年，更會有一架故事巴士進行環台表演佢地今年既劇目。
負責人話，其實佢欣賞香港學校的管理模式，有整個董事會架構，容易推動教學理念，但是台灣有政治因素考量，較複雜，校長不能長期連任，拖延了很多教學理念的實施。呢個就係點解佢好高興見到我地學校積極的參與，而我地係香港第一家搞生命教育親子學習體驗的小學。
生命教育，從何說起？我覺得首先由家長自己開始，就好似對講機，要調教channel 先可以對話一樣。如果家長自己唔調整心態，用高壓用強權，又或者家長一味退讓完全無底線，揾唔啱同小朋友的channel，結果會係孩子越來越大，距離越來越遠，關係越來越差，直到你發現你已經唔可以再靠「強勢」去令佢地「屈服」，傷口就更加難以癒合。所以，生命教育要早開始！
究竟呢幾日有乜嘢大體會？要從做蛋糕開始。
沒有留言:
張貼留言